Á morgun er stórstreymt og sjávarstaða há næstu daga.
13.12.2023 Kl: 11:21
Landhelgisgæslan vekur á því athygli að á morgun er
stórstreymt og verður sjávarstaða því há næstu daga. Samhliða gera veðurspár
ráð fyrir suðvestan stormi á öllum miðum og djúpum ásamt mikilli ölduhæð suður
og vestur af landinu.
Þá hefur Veðurstofan gefið út gular viðvaranir á sunnan-
og vestanverðu landinu. Má því reikna með þungu brimi við ströndina auk þess
sem áhlaðandi vegna veðurs og sjólags auki enn frekar við sjávarhæð sunnan- og
vestanlands.
Landhelgisgæslan hvetur því til aðgæslu við ströndina þar sem
áhrifa sjógangs og aukinnar sjávarhæðar gætir og að hugað verði að skipum og
bátum í höfnum.
Ölduspákort klukkan 06:00 14.12.2023. Kort fengið af sjolag.is.
