NULL
Landhelgisgæslan tók í dag þátt í einni stærstu flugslysaæfingu sem haldin hefur verið hér á landi. Æfingin var haldin á Keflavíkurflugvelli og tóku þyrla Landhelgisgæslunnar, TF-SYN og flugvél Landhelgisgæslunnar, TF-SIF þátt í æfingunni ásamt starfsmönnum Landhelgisgæslunnar í Keflavík og starfsmönnum á aðgerðasviði og í stjórnstöð Landhelgisgæslunnar. Auk þess lagði Landhelgisgæslan til flugskýli á starfssvæði Landhelgisgæslunnar á Öryggissvæðinu á Keflavíkurflugvelli. Yfir 500 þátttakendur úr ýmsum áttum tóku þátt í æfingunni, svo sem lögregla, slökkvilið, björgunarsveitir og fleiri en æfingin var skipulögð af Isavia og almannavörnum.
Æfingin er liður í að æfa stjórnun og samhæfingu viðbragðsaðila og samskipti þeirra á milli. Þá er jafnframt farið yfir þau atriði sem betur mega fara til að viðbragsaðilar séu sem best viðbúnir.
Á æfingunni var líkt eftir því að þota með 150 farþega tilkynnir um hita í hreyfli og brotlendir að lokum utan brautar. Reynt var að gera vettvanginn eins raunverulegan og kostur var og meðal annars kveikt í bílflökum til að herma eftir flugvélaskrokki og skurðir grafnir til að láta líta út eins og vélin hefði brotlent og dregist eftir jörðinni.
Hlutverk þyrlu og flugvélar Landhelgisgæslunnar í æfingunni var að flytja slasaða á sjúkrahús. Þá önnuðust starfsmenn Landhelgisgæslunnar öryggisgæslu og umsýslu á söfnunarsvæði slasaðra sem er í flugskýli Landhelgisgæslunnar á Keflavíkurflugvelli. Síðastliðna mánuði hefur Landhelgisgæslan í samstarfi við Isavia verið að útbúa aðstöðu í flugskýlinu fyrir söfnunarsvæði slasaðra og þá aðila sem koma að málum verði slys á flugvellinum.
Æfingin gekk vel og voru þátttakendur afar sáttir að henni lokinni.
| |
| Þyrla Landhelgisgæslunnar tilbúin til að flytja slasaða á sjúkrahús. |
 |
| Flugvél Landhelgisgæslunnar, sem er afar vel útbúin til sjúkraflutninga, var nýtt til að flytja slasaða. |
 |
| Úr flugskýli Landhelgisgæslunnar á Keflavíkurflugvelli þar sem komið hefur verið upp aðstöðu og skipulagi til móttöku slasaðra. |
 |
| Nóg pláss er í flugskýli Landhelgisgæslunnar þannig að viðbragðsaðilar geta auðveldlega athafnað sig. |
