Skipstjóri fiskibáts sendi frá sér neyðarkall vegna leka

Skipstjóri fiskibáts sendi frá sér neyðarkall eftir að leki kom að bátnum sem var á veiðum í mynni Arnarfjarðar á tíunda tímanum í morgun

19.6.2023 Kl: 11:19

Skipstjóri fiskibáts sendi frá sér neyðarkall eftir að leki kom að bátnum sem var á veiðum í mynni Arnarfjarðar á tíunda tímanum í morgun. Þyrla Landhelgisgæslunnar var þegar í stað kölluð út á fyrsta forgangi sem og björgunarskip á vegum Slysavarnafélagsins Landsbjargar frá Patreksfirði. Þá voru skip í grenndinni beðin um að halda á staðinn.

Skipstjóri fiskibátsins tjáði varðstjórum í stjórnstöð Landhelgisgæslunnar að dæla bátsins hefði ekki undan og lestin væri að fyllast af sjó.

Fiskibátar sem staddir voru skammt frá vettvangi voru snöggir á staðinn. Áhöfn eins þeirra kom dælum um borð sem höfðu undan og festu bátinn utan á síðuna. Neyðarástandi var þá aflýst og þyrla Landhelgisgæslunnar afturkölluð. Ákveðið var að björgunarskip Slysavarnafélagsins Landsbjargar héldi sinni ferð áfram með fleiri dælur til öryggis. Björgunarskipið mun taka við bátnum og draga hann til hafnar.