-Yfirvofandi hætta er liðin hjá
1.10.2020 Kl: 14:12
Stjórnstöð Landhelgisgæslunnar barst neyðarkall frá áhöfn fiskiskips
úti fyrir Norðurlandi á öðrum tímanum í dag vegna elds um borð. Þyrlusveit
Landhelgisgæslunnar var þegar í stað kölluð út. Að auki voru sjóbjörgunarsveitir á
vegum Slysavarnafélagsins Landsbjargar á Norðurlandi kallaðar út en þær koma
til með að flytja slökkviliðsmenn að fiskiskipinu. Jafnframt voru bátar í
grenndinni beðnir um að halda á staðinn.
Fjórir eru í áhöfn skipsins og tókst
þeim fljótt að ráða niðurlögum eldsins. Slökkvikerfi skipsins var virkjað og
lokað niður í vélarrúm. Tveir fiskibátar eru komnir að skipinu og yfirvofandi
hætta er liðin hjá.
Þyrla Landhelgisgæslunnar tók á loft frá Reykjavík klukkan
13:40 en hefur verið afturkölluð. Gert er ráð fyrir að fiskiskipið, sem er nú
vélarvana, verði dregið til hafnar af öðru fiskiskipi, Björgu, sem statt var á
siglingu um 10 sjómílum frá.
