Týr lét úr höfn

Áhöfn Týs brást skjótt við kallinu

26.11.2020 Kl: 20:09

Áhöfnin á varðskipinu Tý brást skjótt við þegar ákveðið var að kalla hana út á ellefta tímanum í morgun til að auka viðbragð á sjó þar sem engin björgunarþyrla eða flugvél er tiltæk vegna verkfalls flugvirkja. 

Varðskipið lét úr höfn í Reykjavík á áttunda tímanum í kvöld og hélt áleiðis til Vestmannaeyja. 

Georg Kr. Lárusson, forstjóri Landhelgisgæslunnar, ræddi við áhöfnina fyrir brottför og þakkaði henni kærlega fyrir fórnfýsina. Áhöfnin var í fríi þegar kallið kom og alls ekki sjálfgefið að hægt sé að manna varðskip á jafn skömmum tíma og raunin varð í dag. Þeir fyrstu voru komnir um borð upp úr hádegi og aðrir keyrðu alla leið frá Norðurlandi. Séraðgerðasveit Landhelgisgæslunnar aðstoðaði við undirbúning brottfararinnar. 

Afar mikilvægt er að hafa tvö varðskip á sjó við þessar aðstæður en varðskipið Þór er statt fyrir norðan land. Alls voru 200 skip og bátar á sjó í kerfum Landhelgisgæslunnar um miðjan dag. 

Týr verður til taks næstu daga á suðvesturhluta Íslandsmiða ef á þarf að halda.

Týr lætur úr höfn.Vélarnar ræstar.Landfestar losaðar.Séraðgerðasveit Landhelgisgæslunnar fjarlægir landganginn.
Einar Valsson, skipherra, kom keyrandi frá Húsavík.
Georg Lárusson, forstjóri Landhelgisgæslunnar, ræðir við áhöfnina fyrir brottför.
Varðskipið Týr við Faxagarð.