Varðskipið Freyja gert tilbúið til heimferðar

Skipið málað í litum Landhelgisgæslunnar í Rotterdam.

19.10.2021 Kl: 15:12

Varðskipið Freyja er nú komið í slipp í Rotterdam þar sem það er málað í litum Landhelgisgæslunnar. Prófanir fóru fram á skipinu og búnaði þess í síðustu viku og gengu vel.
Gert er ráð fyrir að skipið verði afhent Landhelgisgæslunni í næstu viku og búist er við að það komi heim til Siglufjarðar laugardaginn 6. nóvember.
Með tilkomu Freyju í flota Landhelgisgæslunnar mun Landhelgisgæslan hafa á að skipa tveimur afar öflugum varðskipum, sérútbúnum til að sinna löggæslu, leit og björgun á krefjandi hafsvæðum umhverfis Ísland. 
Varðskipið Freyja er að miklu leyti sambærilegt varðskipinu Þór hvað stærð og aðbúnað varðar en það býr til að mynda yfir mun meiri dráttar- og björgunargetu en Þór. Varðskipið Freyja verður 86 metra langt og 20 metra breitt.

Friðrik Höskuldsson, yfirstýrimaður, og Einar H. Valsson, skipherra, í Rotterdam.

Freyja í slipp.

Varðskipið Freyja málað í Rotterdam.