Neyðarástand um borð í kjarnorkuknúnu flutningaskipi um 110 sjómílur norður af Þórshöfn var sett á svið.
4.10.2022 Kl: 14:10
Landhelgisgæslan og
Geislavarnir ríkisins stóðu nýverið að viðbúnaðaræfingu í samstarfi við
systurstofnanir í Noregi og Danmörku. Neyðarástand um borð í kjarnorkuknúnu
flutningaskipi um 110 sjómílur norður af Þórshöfn var sett á svið og var
hlutverk þátttakenda að bregðast við
því.
Æfingin er hluti af
verkefni sem styrkt er af Norrænum kjarnöryggisrannsóknum (NKS) og samanstendur
af syrpu æfinga, auk útgáfu handbókar og viðbragðsleiðbeininga á sviði öryggis
og viðbúnaðar vegna geislavár á sjó. Æfingunni var stjórnað frá háskólanum Nord
í Bodö en þátttakendur frá Landhelgisgæslunni og Geislavörnum nýttu samhæfingarmiðstöð
almannavarna til þátttöku.
Æfingin var afar gagnleg
og reyndist kærkomið tækifæri til að samhæfa viðbrögð stofnana sem allar stefna
að sama marki en hafa fá tilefni til samvinnu. Samvinna er lykill að árangri í
aðstæðum eins og um ræðir í æfingunni, m.a. miðlun upplýsinga úr sérhæfðum tölvulíkönum
þar sem samkeyrðar eru upplýsingar um veður og uppsprettu geislunar til að
greina bestu nálgun að björgun og viðbrögðum.
Staðsetning atburðarins.
