Í síðustu viku gaf Landhelgisgæsla Íslands út nýtt sjókort af innanverðum Breiðafirði sem ber heitið Flatey – Reykhólar og er númer 428. Kortið er hið fyrsta af nokkrum nýjum sjókortum sem fyrirhuguð eru af þessu svæði Breiðafjarðar í mælikvarðanum 1:50 000. Hið nýja sjókort byggir bæði á nýjum fjölgeisladýptargögnum sem sjómælingabáturinn Baldur hefur safnað á síðustu árum, auk eldri eingeislamælinga.
Í kjölfar fjölgeislamælinga Baldurs í Breiðafirðinum hafa einnig verið gefin út ný hafnarkort fyrir Reykhóla og Brjánslæk auk þess sem hafnarkortin fyrir Flatey og Stykkishólm voru uppfærð með nýjum og nákvæmari dýptarupplýsingum. Öll hafnarkortin eru í mælikvarðanum 1:10 000.
Með útgáfu þessa nýja sjókorts er lögð áhersla á að koma út til sjófarenda nýjum og nákvæmum dýptarupplýsingum á siglingaleiðinni inn til Reykhóla en jafnframt eru í kortinu nýjar fjölgeislamælingar við Flatey og á siglingaleiðinni þar norður um. Sjókortin sem áður hafa þjónað sjófarendum á þessu svæði voru annars vegar gefin út 1946 og hins vegar 1915 en það kort er jafnframt það elsta sem enn er í notkun hér við land. Þörfin á nýju sjókorti var því orðin brýn.
Þar sem ekki hefur unnist tími til afla nýrra fjölgeisladýptargagna af öllu svæðinu sem þetta nýja sjókort nær yfir eru jafnframt í kortinu eldri mælingar sem gerðar voru með eingeisladýptarmæli árin 1954 og 1975 og fór mikil og tímafrek vinna í að fella þessar gömlu og nýju mælingar saman ásamt því að leiðrétta og uppfæra þurfti gamlar staðsetningaupplýsingar eyja, skerja og boða auk strandlínu.
Siglingaleiðin til Reykhóla liggur um verndarsvæði Breiðafjarðar og þrátt fyrir að umferð erlendra skipa sé ekki mikil á þessu svæði er ljóst að takmarkaðar dýpisupplýsingar og miklar skekkjur í hinum eldri sjókortum gerðu ókunnugum erfitt fyrir að fara um svæðið með öruggum hætti og því þótti afar mikilvægt að koma hinu nýja korti út, þó svo að ekki væru til nýjar fjölgeislamælingar í allt kortið.
Þar sem enn er stuðst við hinar gömlu eingeislamælingar í hluta af nýja sjókortinu er mikilvægt að notendur kortsins geri greinarmun á gæðum þeirra dýptarupplýsinga sem í kortinu eru. Til að auðvelda sjófarendum að greina muninn á skiptingu svæða eldri og nýrri mælinga þá eru svæðin með gömlu mælingunum merkt sérstaklega með varúðartexta auk þess sem dýpistölur eru uppréttar á svæðum gömlu mælinganna en skáletraðar þar sem dýpisupplýsingar byggja á nýjum og nákvæmum fjölgeislamælingum. Jafnframt eru mörk svæða með gömlum og nýjum dýptarupplýsingar afmörkuð með bleikri brotalínu. Þá sýnir innfellt heimildakort yfirlit og þekju framangreindra mælinga, sem og ómældra svæða, en á rafrænum sjókortum er möguleiki á að kalla fram svokallaðar CATZOC upplýsingar sem lýsa gæðum mælinga í sjókortum. Sjófarendur eru því hvattir til að kynna sér vel hið nýja sjókort.
Sjókortið nýja er bæði gefið út rafrænt og á pappír, en reikna má með að nokkrar vikur taki fyrir erlenda framleiðendur rafrænna sjókorta að koma því í sölu til sjófarenda.
Hafinn er undirbúningur að útgáfu næsta sjókorts í Breiðafirði en það kort mun ná yfir svæðið frá Elliðaey að Brjánslæk.
Meginþungi verkefna sjómælinga- og siglingaöryggisdeildar Landhelgisgæslunnar eru dýptarmælingar með fjölgeislamæli og svo í framhaldi þeirra uppfærsla og viðhald á sjókortum sem í gildi eru, en þau eru um 90 talsins. Á síðasta ári voru t.a.m. uppfærð eða leiðrétt 56 sjókort, ýmist með nýjum dýptarupplýsingum eða upplýsingum um breytingu á mannvirkjum og/eða sjómerkjum. Það er því ekki á hverjum degi sem ný sjókort eru gefin út og því þótti við hæfi að fagna áfanganum með köku, sem að sjálfsögðu var skreytt með mynd af hinu nýja sjókorti nr. 428.
