Grænlenskir sjómenn æfa með Landhelgisgæslunni og Slysavarnaskólanum
Á dögunum sóttu 13 grænlenskir sjómenn öryggisfræðslu hingað til lands.
24.2.2020 Kl: 13:49
Á dögunum sóttu 13 grænlenskir sjómenn öryggisfræðslu hingað til lands, bæði bóklega og verklega, í samstarfi við Slysavarnaskóla sjómanna. Þar var farið yfir mikilvæg öryggisatriði er snúa að störfum sjóferenda.
Á grunnnámskeiði Slysavarnaskóla sjómanna er gjarnan haldin sameiginleg æfing Slysavarnaskólans og þyrlusveitar Landhelgisgæslunnar þar sem nemendur eru hífðir um borð í þyrlu. Á föstudag fengu Grænlendingarnir að taka þátt í einni slíkri. Slík þjálfun er afar mikilvæg fyrir sjómenn og einnig fyrir björgunarfólk. Farið var á björgunarskipinu Ásgrími S. Björnssyni út á ytri höfn Reykjavíkur þar sem þátttakendur voru hífðir um borð í TF-EIR, þyrlu Landhelgisgæslunnar.
Námskeiðið gekk vel og svo gæti farið að nemendur frá austurströnd Grænlands komi hingað að staðaldri þegar fram líða stundir. Myndirnar af æfingunni á föstudag tók Árni Sæberg, ljósmyndari Morgunblaðsins.
Frá æfingunni á föstudag. Mynd: Árni Sæberg
Frá bóklega hluta námskeiðsins. Mynd: Snorre Greil.
Hópurinn að lokinn æfingu. Mynd: Árni Sæberg.
Einn nemenda hífður um borð í þyrlu Landhelgisgæslunnar. Mynd: Árni Sæberg
Sigmaður Landhelgisgæslunnar. Mynd: Árni Sæberg.