Heiðraður af samstarfsfélögum

Varðskipið Þór er nú við öryggisgæslu og eftirlit á Íslandsmiðum og stóð vaktina yfir páskahelgina. Ferð varðskipsins nú er um margt sérstök því skipherra ferðarinnar, Sigurður Steinar Ketilsson er í sinni síðustu ferð eftir 50 ára farsælan feril hjá Landhelgisgæslunni. Einnig er yfirvélstjóri varðskipsins, Egill H. Bjarnason að láta af störfum eftir 7 ára starf og hefja töku eftirlauna nú í apríl líkt og skipherrann.

Varðskipsáhafnir Landhelgisgæslunnar ákváðu af þessu tilefni að koma okkar þaulreynda skipherra á óvart sem og yfirvélstjóranum og á páskadag voru þeir heiðraðir af samstarfsfélögum. Brytinn um borð reiddi fram páskadagsmáltíð sem hæfir skipherra eftir 50 ára starf á fjölbreyttum vettvangi Landhelgisgæslunnar. Með kaffinu var boðið upp á konfekt, brauðtertu og væna súkkulaðiköku og kvöldmaturinn samanstóð af grilluðu páskalambi ásamt sósu og salati. Ekki spillti fyrir ánægju skipherrans og áhafnarinnar að fá ís með bláberjum og jarðarberjum í eftirrétt í tilefni dagsins.

Mikil leynd hafði hvílt yfir því sem framundan var og því kom það skipherranum og yfirvélstjóranum á óvart er þeir voru kallaðir upp til að veita viðtöku einstaklega fallegri og veglegri gjöf sem samstarfsfélagar þeirra höfðu slegið saman í.

Skipherrann, Sigurður Steinar Ketilsson var kampakátur eftir heiðrun félaganna.

 

Brytinn um borð í varðskipinu Þór, Bergvin Gíslason skellti í eina væna súkkulaðiköku og glæsilega brauðtertu í tilefni dagsins.

Þeir Egill H. Bjarnason yfirvélstjóri til vinstri og Sigurður Steinar Ketilsson skipherra til hægri, að vonum hissa en glaðir með óvæntu uppákomuna.

Falleg gjöf handa þeim köppum frá áhöfnum varðskipa Landhelgisgæslunnar.