Krefjandi björgunaraðgerð í Gleiðarhjalla
Þyrlusveit og björgunarsveitir kallaðar út
4.9.2023 Kl: 9:52
Þyrlusveit Landhelgisgæslunnar var kölluð út á föstudaginn vegna pilts í sjálfheldu í miklum bratta í Gleiðarhjalla fyrir ofan Ísafjörð. Björgunarsveitarfólk á vegum Slysavarnafélagsins Landsbjargar var sömuleiðis kallað út og hélt upp í fjallið að drengnum.
Vegna aðstæðna var talið heppilegast að hífa piltinn um borð í þyrluna en afar krefjandi aðstæður voru á staðnum. Þegar hífingar hófust voru um 26 metrar á sekúndu á staðnum og mikill bratti. Sigmaður þyrlunnar for niður með lykkju að piltinum og hífði hann í kjölfarið upp. Drengurinn var kaldur eftir veruna í fjallinu en laus við meiðsli.
Á meðfylgjandi myndum sem teknar voru af björgunarsveitarmönnum í fjallinu má sjá hve krefjandi aðstæðurnar voru fyrir björgunarfólk á vettvangi.
TF-GRO, þyrla Landhelgisgæslunnar, á staðnum.
Pilturinn hífður upp.
Sigmaður þyrlunnar fór niður með lykkju og hífði piltinn upp.
Pilturinn var farþegi skemmtiferðaskips sem sést hér í bakgrunni.