Vel heppnaður sjómannadagur að baki.
13.6.2022 Kl: 11:20
Sjómannadagurinn var haldinn hátíðlegur um allt land í dag. Fjölmenni lagði leið sína í miðborg Reykjavíkur þar sem gestum bauðst að sigla með varðskipinu Þór. Venju samkvæmt sýndi þyrlusveitin hvernig björgun úr sjó er framkvæmd í Reykjavíkurhöfn, Hafnarfjarðarhöfn og í höfninni á Akranesi.Hátíðahöldin hófust með hefðbundnum hætti klukkan 10 í morgun þegar minningarstund um þá sem hlotið hafa vota gröf hér við land fór fram við Minningaröldurnar í Fossvogskirkjugarði. Að athöfn lokinni var haldin sjómannadagsmessa í Dómkirkjunni. Á meðfylgjandi mynd má sjó þátttakendur Landhelgisgæslunnar ásamt Guðna Th. Jóhannessyni, forseta Íslands, og Sveini Valgeirssyni, dómkirkjupresti.
Sjómælingaskipið Baldur
var í höfn á Ísafirði. Engin hátíðarhöld eru á Ísafirði á
sjómannadegi og tók áhöfnin því þátt í hátíðarhöldum dagsins í
Bolungarvík.
Samkvæmt
venju var hópganga frá höfninni að Hólskirkju þar sem messað var í tilefni
dagsins. Að guðsþjónustu lokinni voru blómsveigir lagðir að minnisvörðum í
kirkjugarðinum í Bolungarvík og við þá athöfn stóð áhöfn Baldurs heiðursvörð.
Til hamingju með daginn sjómenn!
Áhöfn Baldurs var á Ísafirði og ták þátt í hátíðarhöldum í Bolungarvík. 
Þátttakendur Landhelgisgæslu Íslands með forseta Íslands að lokinni sjómannadagsmessu.
Mynd sem Helgi Hjálmtýsson í
Bolungarvík tók af áhöfn Baldurs eftir að blómsveigur var lagður að minnisvarða
Bolvíkinga um horfna, drukknaða og látna ástvini.
