-Ferð hvors varðskips nú fimm vikur í stað þriggja
25.3.2020 Kl: 16:11
Til að tryggja að Landhelgisgæslan geti haldið úti öflugu viðbragði á hafinu umhverfis Ísland, miðað við þær sóttvarnaráðstafanir sem nauðsynlegar eru, hafa ferðir varðskipanna verið lengdar. Hvort skip er nú fimm vikur í senn á sjó í stað þriggja eins og venjulegt er.
Upphaflega var gert ráð fyrir að varðskipið Týr kæmi til Reykjavíkur eftir þriggja vikna úthald í þessari viku en þess í stað kom skipið til höfuðborgarinnar, náði í kost, og hélt að því búnu aftur á miðin. Þá fór varðskipið Þór frá Reykjavík í vikunni og sigldi vestur á firði þar sem skipið verður til taks næstu daga.
Gripið hefur verið til umfangsmikilla varúðarráðstafana á starfsstöðvum Landhelgisgæslunnar. Ákvörðunin um aukna viðveru varðskipanna á Íslandsmiðum, vegna þess ástands sem nú ríkir, var tekin í samráði við áhafnir skipanna. Mikill skilningur var hjá áhöfnunum á mikilvægi þess lengja ferðir skipanna og voru allir tilbúnir til að leggja sitt af mörkum svo vel megi fara. Landhelgisgæslan er afar þakklát áhöfnunum fyrir fórnfýsina.
Bangsi í glugga og afmæli yfirstýrimanns
Um borð í skipunum gengur lífið sinn vanagang. Nýjasti meðlimurinn í áhöfn Týs er bangsinn Loki sem hefur aðsetur í brú varðskipsins. Þetta skemmtilega framtak áhafnarinnar er liður í verkefninu bangsi í glugga sem ætlað er að gleðja börn nú um stundir.
Um borð í báðum varðskipum eru viðhafðar strangar sóttvarnir og þegar kostur var sóttur til Reykjavíkur fór áhöfn Týs í einu og öllu eftir reglunum eins og meðfylgjandi myndir sýna.
Ferð varðskipsins Þórs hófst á afmælisveislu en yfirstýrimaðurinn Páll Geirdal fagnaði fimmtugsafmæli fyrr í mánuðinum.
Páll Geirdal sem sést hér til hægri varð fimmtugur fyrr í mánuðinum. Hann er hér með Bergvin Gíslasyni, bryta.
Bangsinn Loki er nýjasti áhafnarmeðlimurinn um borð í varðskipinu Tý.
Verkefnið bangsi í glugga er ætlað að gleðja yngstu börnin. 
Farið var eftir leiðbeiningum um sóttvarnir þegar kostur fluttur um borð í Tý.
Úthald hvors varðskips er nú fimm vikur í stað þriggja.
Mynd: Guðmundur St. Valdimarsson.
