Varðskipið Freyja kemur til Siglufjarðar í dag og áhöfnin skimuð af þyrlusveit

Freyja leggst að bryggju á Siglufirði í dag.

6.11.2021 Kl: 7:35

Fyrsta æfing þyrlusveitar Landhelgisgæslunnar og áhafnarinnar á varðskipinu Freyju fór fram í gær þegar skipið var austur af landinu. Áhöfnin tók á móti sigmanni og lækni þyrlunnar á þilfari skipsins sem framkvæmdu PCR-próf á áhöfninni fyrir komuna til Siglufjarðar. Samspil þyrlusveitar og áhafnar Freyju gekk hratt og vel fyrir sig.

Varðskipið Freyja lagði af stað frá Rotterdam áleiðis til Íslands á þriðjudag. Skipið kom inn í efnahagslögsöguna um hádegi í gær og sigldi svo inn í íslenska landhelgi laust fyrir klukkan tíu í gærkvöld. Freyja mun leggjast að bryggju á Siglufirði klukkan 13:30 í dag í fylgd varðskipsins Týs, þyrlu Landhelgisgæslunnar og björgunarskipsins Sigurvins. Þá verður þremur púðurskotum skotið úr fallbyssu skipinu til heiðurs. 

Forseti Íslands, dómsmálaráðherra, bæjarstjórinn í Fjallabyggð og forstjóri Landhelgisgæslunnar verða meðal þeirra sem taka á móti skipinu þegar það kemur til hafnar í dag.

Sigmaður Landhelgisgæslunnar kemur um borð í varðskipið Freyju.

Varðskipið Freyja.

Kolbeinn Guðmundsson, sigmaður og stýrimaður, tekur sýni af áhöfninni.

PCR próf voru framkvæmd á áhöfn Freyju.

Friðrik Höskuldsson, yfirstýrimaður, færir til bókar þegar Freyja siglir inn í íslenska landhelgi í gærkvöldi.

Um borð í TF-GNA.