Þyrla Landhelgisgæslunnar sótti slasaðan sjómann í þýskan togara á Reykjaneshrygg

Mánudagur 5. maí

Þyrla Landhelgisgæslunnar lenti eftir miðnætti við Landspítala Háskólasjúkrahús með slasaðan sjómann af þýska togaranum Atlantic Peace. Skipstjóri Atlantic Peace hafði samband við stjórnstöð Landhelgisgæslunnar um áttaleytið í gærkvöldi og óskaði eftir læknisaðstoð vegna slasaðs sjómanns um borð. Honum var gefið samband við lækni í áhöfn TF-LIF sem taldi nauðsynlegt að sækja manninn með þyrlu.

Áhöfn TF-LIF var kölluð út kl. 20:11 og fór þyrlan í loftið kl. 20:49. Fljúga þurfti um 240 sjómílur að skipinu sem var að karfaveiðum á Reykjaneshrygg og var þyrlan komin þangað kl. 22:45.  TF-LIF lenti við Landspítala Háskólasjúkrahús í Fossvogi kl. 0:37.

Dagmar Sigurðardóttir upplýsingafulltrúiLandhelgisgæslu Íslands