Dæmdir fyrir ólöglegar línuveiðar á friðuðu svæði

Mánudagur 2. apríl 2012

Tveir skipstjórar línubáta voru nýlega dæmdir í Héraðsdómi Reykjaness til að greiða hvor um sig 400 þúsund króna sekt í Landhelgissjóð fyrir að hafa verið að ólöglegum línuveiðum á friðuðu svæði.

Það sérstaka við þessi mál er að í hvorugu tilfelli hafði Landhelgisgæslan tök á því að senda varðskip eða loftfar á svæðið heldur var stuðst við gögn úr fjareftirlitskerfi LHG sem reynst hefur vel undanfarin ár, bæði við eftirlit með flutninga- og fiskiskipum og í björgunaraðgerðum. Þess skal getið að gögn úr fjareftirliti hafa áður verið notuð í dómsmálum vegna fiskveiðibrota, en árið 2002 voru tveir norskir skipstjórar dæmdir fyrir ólöglegar loðnuveiðar norður af landinu og nær eingöngu stuðst við gögn úr fjareftirliti.