Þyrlusveit Landhelgisgæslunnar aðstoðaði við slökkvistörf

Þyrlusveit Landhelgisgæslunnar var kölluð út á fimmta tímanum í dag vegna gróðurelda í Þjóðbrókargili, skammt frá Hólmavík.

Viðbragðsaðilar áttu í erfiðleikum með að komast að eldinum og því varð að kalla þyrlu Landhelgisgæslunnar út til að annast slökkvistörf með slökkviskjólu.

Skjólan var fyllt af vatni í nokkur skipti og vatninu svo sleppt yfir eldinn.

Slökkvistörf gengu vel og á áttunda tímanum hafði eldurinn verið slökktur og þá gat þyrlusveitin haldið aftur til Reykjavíkur.