Sjö útköll um helgina

Þyrlur Landhelgisgæslunnar gerðar út frá Akureyri og Reykjavík.

13.8.2023 Kl: 11:08

Helgin hefur verið annasöm hjá þyrlusveit Landhelgisgæslunnar sem hefur sinnt sjö útköllum frá föstudegi.
Á tíunda tímanum í gærkvöld var áhöfnin á TF-GNA kölluð út vegna mótorhjólaslyss norður af Vatnajökli. Þyrlan kom á staðinn um klukkan hálf ellefu og flutti þann slasaða á Sjúkrahúsið á Akureyri. Klukkan 00:30 barst tilkynning um alvarlegt umferðarslys á Ólafsfjarðarvegi við Kambhól og var þyrlan þegar í stað kölluð út frá Akureyri að beiðni lögreglunnar á Norðurlandi eystra. Einn var fluttur slasaður á Sjúkrahúsið á Akureyri.
Á sama tíma var óskað eftir þyrlu til að flytja einn slasaðan úr Flatey vegna falls og var áhöfnin sem var í Reykjavík kölluð út ásamt sjúkraflutningamanni frá Slökkviliði höfuðborgarsvæðisins.
Þyrlur Landhelgisgæslunnar hafa verið gerðar út frá Akureyri og Reykjavík um helgina. Á föstudag annaðist þyrlusveitin fjögur útköll og því eru útköll helgarinnar alls sjö talsins.
Þyrlusveitin í útkalli um helgina. 
TF-GNA á flugi.