Vaktskýlið flutt af Faxagarði
Vaktskýlið var flutt með varðskipinu Þór til Helguvíkur.
7.1.2020 Kl: 14:29
Vaktskýli Landhelgisgæslunnar var flutt frá Faxagarði í Reykjavík til Helguvíkur með varðskipinu Þór síðdegis í gær. Þar með lauk 60 ára sögu vaktskýlis Landhelgisgæslunnar sem hefur hýst vaktmenn Landhelgisgæslunnar og allra síðustu ár starfsmenn Securitas við bryggjuaðstöðu í höfninni.
Skýlið víkur fyrir nýrri spennistöð sem til stendur að reisa við höfnina. Faxaflóahafnir stefna jafnframt á að byggja nýja vaktaðstöðu tengda spennistöðinni. Vaktskýlið var híft um borð í varðskipið Þór en með undirstöðum vó það um 19 tonn. Þrátt fyrir það fór ekki mikið fyrir því á afturþilfari Þórs.
Varanlegri viðveru vaktmanna Landhelgisgæslunnar í skýlinu á Faxagarði lauk fyrir fjórum árum en síðan þá hafa starfsmenn Securitas séð um vöktun svæðisins.
Vaktskýlið skipaði til fjölda ára stóran sess í starfsemi Landhelgisgæslunnar því starfsmenn, fyrrverandi starfsmenn og velunnarar komu þar gjarnan saman og ræddu landsins gagn og nauðsynjar yfir kaffibolla.
Gamla vaktskýlinu verður fyrst um sinn komið fyrir í Helguvík.
Meðfylgjandi myndir tók Jón Páll Ásgeirsson, stýrimaður.
Vaktskýlið um borð í varðskipinu Þór. JPÁVaktskýlið vó 19 tonn með undirstöðum. JPÁVarðskýlið híft.