Fyrir skömmu stóð Landhelgisgæslan fyrir árlegum fundi Norræna sjómælingaráðsins (Nordic Hydrographic Commission, NHC) sem sjómælingastofnanir Norðurlandanna skiptast á að halda. NHC er eitt af 15 svæðisráðum Alþjóðasjómælingastofnunarinnar (IHO), en rúmlega 100 ríki eru aðilar að IHO og er Landhelgisgæslan fulltrúi Íslands í þessu alþjóðlega samstarfi.
NHC er elsta svæðisráðið, stofnað 18. mars 1929, og hafa helstu markmið NHC í gegnum tíðina verið að skiptast á skoðunum varðandi allt sem viðkemur sjómælingum og sjókortagerð og samræma norræna starfshætti. Einnig að koma fram sem ein heild er kemur að stefnumörkun og ákvarðanatöku innan Alþjóðasjómælingastofnunarinnar.
Þátttaka sjómælinga- og siglingaöryggisdeildar Landhelgisgæslunnar í samstarfi sem þessu er afar mikilvæg svo unnt sé að taka virkan þátt í framþróun og meðtaka nýjar upplýsingar á vettvangi sjómælinga og sjókortagerðar, með þann tilgang helstan að auka öryggi í siglinum.
Ísland gerðist aðili að Norræna sjómælingaráðinu árið 1956, eða fyrir 70 árum, og var því ánægjulegt að svo vel skuli hittast á að þessi árlegi fundur ráðsins hafi verið haldinn hér á þessum tímamótum, sem jafnframt eru á sama ári og Landhelgisgæslan fagnar 100 ára afmæli. En það eru fleiri tímamót sem vert er að minnast á en á þessu ári eru jafnframt 250 ár liðin frá fyrstu skipulögðu sjómælingum til sjókortagerðar hér við land. Árið 1776 fól Íslandsverslunin danska skipstjóranum Hans Erik Minor að sinna dýptarmælingum í Faxaflóa og við vestanvert og suðvestanvert landið og árið 1788 var fyrsta sjókortið með þessum nýju mælingum gefið út af hinu tiltölulega nýstofnaða Konunglega sjókortasafni Danmerkur. Var þetta kort jafnfram fyrsta sjókortið sem sjókortasafnið danska gaf út. Í opnunarerindi fundarins minntist Georg Kr. Lárusson forstjóri Landhelgisgæslunnar á þessi merku tímamót og fengu fundargestir að gjöf afrit af þessu fyrsta formlega sjókorti Íslands.
