Landhelgisgæslan hlýtur viðurkenningu Jafnvægisvogarinnar

Landhelgisgæsla Íslands er meðal þeirra 163 fyrirtækja, sveitarfélaga og stofnana sem hlutu viðurkenningu Jafnvægisvogarinnar á dögunum fyrir kynjajafnvægi í framkvæmdastjórnum.

Viðurkenningin er veitt þeim sem hafa náð því viðmiði að hlutfall hvors kyns í framkvæmdastjórn sé að minnsta kosti 40%. Markmið Jafnvægisvogarinnar er að ná 40/60 kynjajafnvægi í framkvæmdastjórnum íslenskra fyrirtækja. Fjöldi viðurkenningarhafa jókst um 27,3% milli ára.

Yfirskrift viðurkenningarhátíðarinnar í ár var „Losum um hnútinn“. Hún er jafnframt yfirskrift herferðar Jafnvægisvogarinnar sem hvetur stjórnendur, stjórnir og eigendur til að taka virka afstöðu með jafnrétti og fylgja henni eftir með ákvörðunum.