Skipverja saknað síðan á laugardag
5.12.2022 Kl: 11:11
Leit að skipverjanum sem féll útbyrðis á laugardag hélt áfram í birtingu. Leitað er á svæði sem er um 25 sjómílur frá Garðskaga og hefur leitarsvæðið verið stækkað.
Í gær var leitað á svæði sem var um 10×10 sjómílur en leitarsvæði dagsins er 18×18 sjómílur, um 33×33 kílómetrar að stærð.
Áhöfnin á varðskipinu Þór var á vettvangi í nótt og hóf leit í morgun sem og björgunarskipið Oddur V. Gíslason frá Slysavarnafélaginu Landsbjörg.
Bæði sjólag og veður er gott á svæðinu.
Á meðfylgjandi mynd má sjá Pál Geirdal, skipherra, og Eirík Bragason, yfirstýrimann, fara yfir leitarferla dagsins.
