Baldur og Eir kölluð út vegna Blíðu

Blíða SH-277 steytti á skeri skammt undan Stykkishólmi.

18.6.2019 Kl: 21:58

Um hádegisbil í dag fékk stjórnstöð Landhelgisgæslunnar tilkynningu um að fiskiskipið Blíða SH-277 hefði steytt á skeri skammt undan Stykkishólmi. Fjórir voru um borð. Sjómælinga- og eftirlitsskipið Baldur var umsvifalaust beðið um að halda á staðinn. Sömu sögu er að segja um björgunarsveitina Berserki, sem er á vegum Slysavarnafélagsins Landsbjargar, auk björgunarskipsins Bjargar. Að auki voru nærliggjandi skip beðin um að halda á vettvang en fyrstu bátar á staðinn voru björgunarbáturinn Gunna Sig frá Stykkishólmi og fiskibáturinn Fjóla SH-007.

Rúmri klukkustund eftir að tilkynning um strandið barst Landhelgisgæslunni var Baldur kominn á vettvang og tók áhöfn hans að sér vettvangsstjórn. Til að gæta fyllsta öryggis var TF-EIR, þyrla Landhelgisgæslunnar, einnig beðin um að halda á staðinn. Á fjórða tímanum var fiskiskipið farið að rétta sig af og skömmu síðar var það komið á flot.

Samvinna allra sem að verkefninu komu gekk með miklum ágætum og var fiskiskipið Blíða komið til heimahafnar síðdegis.

Guðmundur Birkir Agnarsson, skipstjóri á Baldri, stýrir aðgerðum á strandstað. Við hlið hans situr Andri Leifsson.

Sjómælinga- og eftirlitsskipið Baldur á vettvangi. 

Blíða SH-277 strandaði um hádegisbil í dag en komst á flot síðdegis. 

Fyrstu bátar á staðinn voru björgunarbáturinn Gunna Sig frá Stykkishólmi og fiskibáturinn Fjóla SH-007.

Mynd af strandstað, tekin úr TF-EIR.

Samvinna allra sem að verkefninu komu gekk afar vel. Myndir: Andri Leifsson.