Sprengikúla úr seinna stríði fannst undir háspennustrengjum á Sandskeiði

-Sprengjusérfræðingar Landhelgisgæslunnar færðu sprengikúluna og eyddu

23.9.2020 Kl: 13:02

Séraðgerða- og sprengjueyðingarsveit Landhelgisgæslunnar var kölluð út á sjötta tímanum í gær að beiðni lögreglunnar vegna sprengikúlu úr seinna stríði sem fannst við línuveg á Sandskeiði. Sprengikúlan lá undir þremur háspennulínum sem liggja til höfuðborgarsvæðisins.

 Vegna staðsetningar sprengikúlunnar þótti öruggast að færa hana úr stað til að koma í veg fyrir tjón á háspennilínunum. Þegar virk sprengikúla er færð úr stað er mikilvægt að það sé gert af þrautþjálfuðum sprengjusérfræðingum sem hafa sérhæfðan búnað til verksins.

Óskað var eftir sjúkrabíl frá slökkviliðinu á höfuðborgarsvæðinu af öryggisástæðum eins og alltaf er gert ef færa þarf sprengju sem þessa. Sprengikúlan var færð á öruggan stað og sprengd í kjölfarið. 

Eyðing sprengikúlunnar gekk vel líkt og samstarf Landhelgisgæslunnar, lögreglunnar á höfuðborgarsvæðinu og Slökkviliðs höfuðborgarsvæðisins.

Á meðfylgjandi myndum má sjá sprengikúluna og viðbragðsaðila á vettvangi.

Sprengikúlan er úr seinni heimsstryjöldinni.

Lögregla og sjúkraflutningamenn á vettvangi.