Áhöfnin á Landhelgisgæsluþyrlunni Sif heil á húfi eftir nauðlendingu í sjónum við Straumsvík - unnið að björgun þyrlunnar

Mánudagur 16. júlí 2007.

Engan sakaði er þyrla Landhelgisgæslunnar, Sif, nauðlenti í sjónum við Straumsvík um kl. 18:50.

Er áhöfnin á Sif var við æfingar með áhöfninni á Einari Sigurjónssyni, björgunarskipi Slysavarnarfélagsins Landsbjargar, varð flugstjórinn á Sif að lenda þyrlunni á sjónum. Ekki er vitað hvað orsakaði þetta. (Staðsetning þyrlunnar er hún lenti á sjónum - 64°03,900n 022°03,900v).

 

Áhöfnin á björgunarskipinu Einari Sigurjónssyni sendi út neyðarkall og tilkynnti um þetta kl. 18:50.  Þá kom fram að þetta liti vel út og að áhöfn Sifjar væri að fara út úr þyrlunni.  Skömmu síðar, eða kl. 18:54, var tilkynnt að áhöfnin væri heil á húfi, komin um borð í björgunarskipið Einar Sigurjónsson. 

 

Önnur þyrluvakt Landhelgisgæslunnar, áhöfnin á þyrlunni Gná, var þegar kölluð út með bráðaútkalli.  Þar sem fljótt kom í ljós að áhöfnin á Sif var heil á húfi fóru aðgerðir eftir það að snúast um að bjarga þyrlunni úr sjónum.

Dagmar Sigurðardóttir
lögfræðingur/upplýsingaftr.