TF-SIF á Flugsafn Íslands á Akureyri
Laugardagur 21.júní 2008
Nú stendur yfir Flughelgi Flugsafns Íslands, á Akureyri. Mikið var um dýrðir við safnið í dag, fjöldi flugvéla var til sýnis auk þess sem vélar af ýmsu tagi sýndu listir sínar. Björgunarþyrla Landhelgisgæslunnar, TF-SIF var í dag afhent safninu og er henni sómi gerður að því, eftir 22 ára dygga þjónustu við Landhelgisgæsluna.
TF-SIF komin á Flugsafn Íslands
Landhelgisgæslan fékk TF-SIF nýja frá verksmiðju árið 1985. Þess má geta að á 22 ára ferli sínum átti Sifin, eins og hún var oft kölluð, þátt í björgun 250 mannslífa, að áætlað er. Hún flaug samtals 7056 klst og 30 mín í þágu Landhelgisgæslunnar á ferlinum áður en hún lenti í sjónum við Straumsvík á síðastliðnu ári.
Georg Lárusson, forstjóri Landhelgisgæslunnar, sagði nokkur orð í tilefni dagsins og minntist afreka þeirra sem starfað hafa á TF-SIF í gegnum tíðina og hversu vel vélin hefði reynst. Einnig notaði hann tækifærið og afhenti Arngrími B. Jóhannssyni, fyrir hönd safnsins, handbók vélarinnar með þeim orðum að vélin væri nú í góðum höndum.
Skúli Jón Sigurðarson flutti tölu og færði safninu merk gögn og myndir að gjöf sem hann hafði haldið til haga.
Svanbjörn Sigurðsson tekur við gjöfinni frá Skúla Jóni Sigurðarsyni
Fjöldi gesta var samankominn í Flugsafninu í tilefni dagsins
Arngrímur B. Jóhannsson heiðraði Ernu Hjaltalín flugkonu fyrir störf
í þágu flugsins.
Erna þakkar Arngrími heiðursgjöfina
Svanbjörn Sigurðsson, safnstjóri Flugsafns Íslands, færði
Georg Lárussyni þakkarskjöld fyrir störf í þágu safnsins.
Ýmsar gerðir véla voru til sýnis
Gestir voru áhugasamir um hinar ólíku flugvélar sem sýndar voru
Þyrlan, TF-LIF og Fokker flugvél Landhelgisgæslunnar TF-SYN voru
einnig til sýnis
Sigurður Steinar Ketilsson skipherra, Georg Lárusson forstjóri LHG,
Höskuldur Ólafsson tæknistjóri Flugdeildar, Páll Halldórsson
fyrrverandi yfirflugstjóri LHG og Benóný Ásgrímsson staðgengill flugrekstrarstjóra
minntust góðra stunda með TF-SIF
Myndir: SRS
21.06.2008 SRS