Neyðarsendir grænlenska togarans Qavak fannst undir bryggjunni á Ægisgarði

Mánudagur 7. desember 2009

Merki frá neyðarsendi fóru að berast snemma á laugardagsmorgun frá togara sem staddur var í Reykjavíkurhöfn. Stjórnstöð Landhelgisgæslunar ræsti út viðeigandi aðila til að finna sendinn og við eftirgrennslan kom í ljós að um var að ræða togarann Qavak frá Grænlandi, sem varð vélarvana um 200 sjómílur suð-vestur af Reykjanesi um miðjan október og varðskipið Ægir dró til hafnar í Reykjavík.

Neyðarsendir skipsins var ekki á þeim stað þar sem hann átti að vera eða fastur á brúarhandriði skipsins. Fyrir skömmu var farið ófrjálsri hendi um skipið og sprengdur upp gúmmbjörgunarbátur og líklega á sama tíma hefur neyðarsendirinn verið fjarlægður úr sínu hulstri og hent á milli skips og bryggju. Þar hefur hann lent inni í hjólbarða sem notaður er sem fríholt við bryggjuna og á flóðinu á laugardagsmorgun ,sem var mjög stórstreymt, náð að komast á flot. Við það fer hann sjálfvirkt í gang er hann kemst í snertingu við sjó.

Fenginn var félagi úr Flugbjörgunarsveitinni til að miða út sendinn á staðnum því hann var hvergi í sjónmáli, en allar vísbendingar og miðanir bentu síðan til þess að hann væri undir bryggjunni á Ægisgarði. Fannst hann þar skömmu síðar, eftir að togarinn hafði verið færður til. Færeyski dráttarbáturinn Thor Goliath kom þar að og sá þá skipstjóri hans ljósmerki frá sendinum undir bryggjunni og sótti hann. Dráttarbáturinn mun draga togarann til Danmerkur til viðgerðar.

Félagar úr Flugbjörgunarsveitinni tóku við sendinum og slökktu á útsendingum hans. Neyðarsendar af þessari gerð senda frá sér merki sem gefur til kynna um hvaða skip sé að ræða og eiga þeir einnig að gefa nokkuð nákvæma staðrákvörðun. Aðvörun frá þeim kemur upp á öllum vakstöðvum sem fylgjast með merkjum frá slíkum sendum og þurfti því að finna sendinn og slökkva á neyðarsendingunni.

Myndir Guðmundur St. Valdimarsson sem teknar voru þegar Ægir tók Qavak í tog þann 12. október sl.