Norska varðskipið KV Harstad æfði með Þór á Eyjafirði
Þriðjudagur 21. ágúst 2012
Norska varðskipið KV Harstad var nýverið við æfingar með varðskipinu Þór á Eyjafirði þar sem áhafnir skipanna æfðu aðstoð við önnur skip, þ.a.m. slökkvistörf og leit að fólki um borð.
©LHG/Árni Sæberg
Fyrri dagurinn var notaður til þjálfunar slökkvistarfa og byrjaði Harstad á að koma Þór til aðstoðar en í æfingunni átti íslenska varðskipið að vera brennandi skip. Sendi Harstad um borð einn stjórnanda, fjóra reykkafara, dælustjóra og sjúkraflutningamann ásamt búnaði. Sama æfing fór fram að því loknu en þá veitti Þór systurskipi sínu sömu aðstoð. Í báðum tilfellum átti að vera um minniháttar bruna að ræða en tveir slasaðir þurftu á aðhlynningu að halda.
Slasaðir undirbúnir fyrir flutning ©LHG/Árni Sæberg
Seinni dagurinn hófst á að Harstad tók Þór í tog en í æfingunni átti Þór að vera rafmagnslaust skip sem ekki gat dregið dráttartaugina til sín. Harstad byrjaði á að skjóta skotlínu yfir og var hún tekin í gegnum „kluss“ stjórnborðsmegin, var síðan útbúin svokölluð þvottasnúra til að draga dráttartaug yfir í Þór. Skiptu varðskipin síðan um hlutverk og fram fór sama æfing.
Mynd ©Eiríkur Bjarnason.
Loks æfði Harstad neyðaraftöppun sem t.d. er framkvæmd í þeim tilfellum þegar leki kemur að skipum og tæma þarf tanka, til dæmis olíutanka eða sjótanka en brunndælan kemst niður um mannop. Léttabátur Harstad flutti tvo menn og búnað yfir í Þór og undirbjuggu þeir dælingu úr tank afturá varðskipinu. Kom síðan Harstad að stjórnborðssíðu Þórs og hífði brunndælu með krana um borð. Var brunndælan tengd olíumengunarhreinsibúnaði varðskipsins nema bursti fjarlægður og brunndælan tengd í staðinn.
Neyðaraftöppun framkvæmd ©LHG/Árni Sæberg
©LHG/Árni Sæberg
Var þá haldið til Akureyrar þar sem áhafnir varðskipanna hittust og fóru yfir æfingarnar og þann lærdóm sem af þeim má draga.
Eru æfingar sem þessar mjög mikilvægar fyrir áhafnir varðskipanna sem eru til taks á Norður Atlantshafi. Þegar kemur að raunverulegum björgunaraðgerðum á hafinu skiptir gríðarlega miklu máli fyrir alla aðila að hafa æft samhæfingu, stjórnun, verklag og vinnubrögð á björgunarvettvangi.
Myndir ©LHG/Árni Sæberg