Jólaball haldið í flugskýli LHG

Laugardagur 15. desember 2012

Jólaball starfsmannafélags Landhelgisgæslunnar var í dag haldið í flugskýlinu við Nauthólsvík. Fjölskyldur starfsmanna fjölmenntu og skemmtu sér konunglega. Sungið og dansað var í kringum jólatréð og hápunktinum var náð þegar þyrlan TF-LÍF kom úr æfingaflugi með jólasveinana Stúf, Hurðaskelli og Gluggagægi innanborðs en þeir fengu far í bæinn ofan af fjöllum.

Það var mjög spenntur krakkahópur sem tók á móti þeim í flugskýlinu. Jólasveinarnir sigu einn af öðrum niður úr þyrlunni í miklu stuði og tóku af kappi þátt í dansinum í kringum jólatréð. Þegar líða tók á skemmtunina fjölgaði aðeins starfsmannahópnum þegar flugvélin TF –SIF lenti á Reykjavíkurflugvelli eftir langt flug frá Kos í Grikklandi,  en þar hefur flugvélin verið um skeið við eftirlit fyrir landamærastofnun Evrópusambandsins. Starfsmannafélagið og starfsmenn flugdeildar sem önnuðust skipulagningu eiga bestu þakkir skildar fyrir frábært jólaball.