Varðskipið Ægir aðstoðar bát sem leki kom að eftir árekstur við annan bát

Stjórnstöð Landhelgisgæslunnar barst kl. 05:56 beiðni um aðstoð frá Gísla/2608 sem lent hafði í árekstri við annan bát. Tveir menn voru um borð. Við áreksturinn kom leki að Gísla/2608 sem jókst hratt svo dælur höfðu ekki undan. Varðskipið Ægir sem statt var skammt frá hélt strax áleiðis til Gísla og sendi varðskipið léttabát sinn með dælur til Gísla. Varðskipsmenn veittu skipverjum á Gísla aðstoð við að dæla sjó úr bátnum og gekk það ágætlega. Varðskipið Ægir fylgir nú Gísla áleiðis til Tálknafjarðar. Er áætluð koma þangað fyrir klukkan tíu.

Léttabátur varðskipsins Ægis kominn að Gísla og varðskipsmenn flytja dælur um borð.

Varðskipsmenn veittu áhöfn Gísla/2608 aðstoð við að dæla sjó úr bátnum.