Sjómannadagurinn 2023

Kristján Þ. Jónsson, fyrrverandi skipherra, heiðraður og Freyja sigldi með hátíðargesti.

5.6.2023 Kl: 10:15

Sjómannadagurinn var haldinn hátíðlegur um allt land í gær. Fjölmenni lagði leið sína í miðborg Reykjavíkur þar sem gestum bauðst að sigla með varðskipinu Freyju. Hátt í 1500 manns nýttu sér tækifærið og sigldu með varðskipinu frá Reykjavík.  

Venju samkvæmt sýndi þyrlusveitin hvernig björgun úr sjó er framkvæmd í Reykjavíkurhöfn, Hafnarfjarðarhöfn og í höfninni á Akranesi.

Hátíðahöldin hófust með hefðbundnum um hætti klukkan 10 í gærmorgun þegar minningarstund um þá sem hlotið hafa vota gröf hér við land fór fram við Minningaröldurnar í Fossvogskirkjugarði.  Að athöfn lokinni var haldin sjómannadagsmessa í Dómkirkjunni. 

Eins og ávallt á sjómannadaginn eru hetjur hafsins heiðraðar fyrir vel unnin störf og því var vel við hæfi að Kristján Þ. Jónsson, fyrrverandi skipherra hjá Landhelgisgæslunni, væri heiðraður fyrir störf sín í þágu íslenskrar þjóðar. Þá var Kristján einnig heiðraður af flugdeild Landhelgisgæslunnar fyrir störf um borð í þyrlum Gæslunnar en Kristján var sá fimmti til að starfa sem sigmaður um borð í þyrlunum.

Til hamingju með daginn sjómenn!

Fólk skoðar sig um í brú Freyju. Friðrik Höskuldsson, yfirstýrimaður, talar í síma og Einar Valsson, skipherra, fylgist með. 

Við Minningaröldurnar í Fossvogskirkjugarði. 

Heiðursvörður.