Fréttasafn

Áhöfnin á varðskipinu Tý var kölluð út á tíunda tímanum í gær til að annast sjúkraflutning frá Siglufirði. Þar þurfti maður að komast undir læknishendur á Akureyri og ekki reyndist unnt að flytja hann landleiðina.

Varðskipið Þór lét úr höfn í Reykjavík klukkan 21 í kvöld og heldur vestur á firði. Áhöfn skipsins var kölluð út í dag vegna snjóflóðahættu á norðanverðum Vestfjörðum.

Varðskipið Týr kom inn á Eyjafjörð í morgun eftir siglingu frá Austfjörðum þar sem skipið var statt við eftirlitsstörf. Siglingin tók um sólarhring í hvassviðri og allmiklum sjó. Áhöfnin á Tý verður til taks á svæðinu vegna óveðurs og ófærðar eins og þurfa þykir í samráði við aðgerðastjórn lögreglu og almannavarnir.

Tvær þyrlur Landhelgisgæslunnar voru kallaðar út að beiðni lögreglunnar á Norðurlandi eystra á öðrum tímanum í dag vegna vélsleðaslyss í Tröllaskaga, nálægt Lágheiði.

Áhöfnin á varðskipinu Þór var kölluð út á níunda tímanum í kvöld þegar fóðurprammi sökk í Reyðarfirði. Vonskuveður er á svæðinu.

Landhelgisgæslunni barst mynd af hafís frá Veðurstofu Íslands, norðvestur af Vestfjörðum. Þar var ísspöngin næst landi um 23 sjómílur. Landhelgisgæslan hafði samband við skip í nálægð við ísröndina og þá kom í ljós að vegna skilyrða væri ísinn að hreyfast hratt frá landi og norður um. Hins vegar geta aðstæður breyst mjög hratt miðað við vindáttir og strauma.