Fréttasafn

Mikill viðbúnaður var hjá Landhelgisgæslunni, björgunarsveitum og lögreglu vegna neyðarboðs sem kom frá eins hreyfils flugvél í Fljótavík á þriðja tímanum í dag. Stjórnstöð Landhelgisgæslunnar fékk neyðarboð frá vélinni klukkan 14:39. 

Síðdegis í gær hafði fiskiskip sem var að veiðum í Húnaflóa samband við stjórnstöð Landhelgisgæslunnar og tilkynnti að talsverður leki væri í vélarúmi skipsins. Skipið sigldi að lokum fyrir eigin vélarafli til hafnar.

Landhelgisgæslan hefur undanfarin tvö ár tekið þátt í nýsköpunarverkefninu AI-ARC. Markmiðið með verkefninu er að auka stöðuvitund og árvekni á sjó en verkefnið er fjármagnað af nýsköpunarsjóði Evrópusambandsins, Horizon 2020. Að því starfa 20 samstarfsaðilar frá 12 Evrópulöndum.

Bleiki dagurinn er í dag og starfsfólk Landhelgisgæslunnar íklætt bleiku gæddi sér á bleikum eftirréttum í tilefni dagsins.

Von er á bandarískri flugsveit til landsins á morgun til að sinna loftrýmisgæslu Atlantshafsbandalagsins við Ísland. Flugsveitin kemur til landsins frá Þýskalandi, með fjórar F-16 herþotur og 120 liðsmenn.

Áhöfnin á varðskipinu Freyju lagði út öldumælidufl við Straumnes á dögunum. Vel gekk að koma duflinu á sinn stað. Þegar verkinu var lokið heyrðist vel í því auk þess sem það sendi upplýsingar inn á vef Vegagerðarinnar.

Guðni Th. Jóhannesson, forseti Íslands, tók þátt í björgunaræfingu með áhöfninni á TF-GRO, þyrlu Landhelgisgæslunnar, við Bessastaði í dag. Sigmaður þyrlunnar seig niður til forsetans sem var staddur í fjörunni yst á nesinu, klæddi forsetann í björgunarlykkju og hífði hann að því búnu um borð í þyrluna.

Landhelgisgæslan vekur athygli á að stormspá er í gildi fyrir mið og djúp í kringum landið. Gert er ráð fyrir að vindur snúist til mjög hvassrar norðlægrar áttar seint í kvöld og í nótt og gera öldulíkön ráð fyrir mikilli ölduhæð norðan við landið á morgun og fram á aðfaranótt miðvikudags.

Landhelgisgæsla Íslands óskar björgunarsveitinni Sæbjörgu innilega til hamingju með björgunarbátinn Stellu sem vígður var við hátíðlega athöfn á höfninni á Flateyri um helgina.