Fréttasafn

Þyrlusveit Landhelgisgæslunnar sinnti tveimur útköllum í dag vegna slasaðs göngufólks. Annars vegar á Snæfelli, norðan Vatnajökuls, og hins vegar á Fimmvörðuhálsi.

Áhöfnin á varðskipinu Tý skipti um öldumælisdufl austur af Surtsey á dögunum. Þá var haldin bátaæfing í blíðviðrinu þar sem öllu var tjaldað til. 

Hafsteinn Heiðarsson, flugstjóri hjá Landhelgisgæslunni, lauk glæsilegum ferli þegar hann lenti TF-SIF í síðasta sinn á Reykjavíkurflugvelli í dag. Hann hefur starfað sem flugmaður hjá Landhelgisgæslunni í rúma þrjá áratugi en áður var hann flugmaður hjá Landgræðslu Íslands. 

Áhöfnin á TF-GRO hélt sameiginlega æfingu með frönsku freigátunni Beautemps-Beaupré á dögunum. Æfingin fór fram í Eyjafirði og þegar TF-GRO kom á svæðið hófust hífingar. Þær fóru fram á afturdekki skipsins og gengu eins og í sögu.

Á öðrum tímanum í dag barst stjórnstöð Landhelgisgæslunnar beiðni um aðstoð frá skipverja sem staddur var úti fyrir ströndum og var með verk fyrir hjarta. Hann var einn um borð í fiskibát og sigldi í átt að Norðurfirði. Þyrlusveit Landhelgisgæslunnar var þegar í stað kölluð út sem og björgunarsveitarmenn frá Slysavarnafélaginu Landsbjörg sem sigldu á móti honum og fylgdu í land. Áhöfnin á TF-GRO tók á móti manninum í Norðurfirði og kom honum undir læknishendur í Reykjavík.

Áhöfnin á TF-GRO, þyrlu Landhelgisgæslunnar, fór í eftirlitsflug í gær með sérfræðinga almannavarnadeildar ríkislögreglustjóra og Veðurstofu Íslands að Grímsvötnum. Meðal annars voru gerðar gasmælingar við Grímsvötn ásamt því sem ástand mælitækja á staðnum var kannað. Þá var vefmyndavél uppfærð á Grímsfjalli.

Áhöfnin á TF-EIR, þyrlu Landhelgisgæslunnar, bjargaði manni úr sjálfheldu á Hólmatindi við Eskifjörð laust eftir klukkan átta í kvöld. Björgunarsveitir á vegum Slysavarnafélagsins Landsbjargar og þyrlusveit Landhelgisgæslunnar voru kallaðar út vegna málsins.

Varðskipið Týr lagðist að bryggju í Reykjavík í morgun eftir rúmlega tveggja vikna úthald. Ferðin hófst á Seyðisfirði og víða var komið við en alls sigldi skipið rúmar 1500 sjómílur. Áhöfnin á Tý sinnti eftirliti í Síldarsmugunni auk hefðbundinni löggæslustarfa innan íslensku efnahagslögsögunnar. Farið var í eftirlitsferðir um borð í sex íslensk skip innan og utan lögsögunnar auk þess sem áhöfnin þurfti að hafa afskipti af jafnmörgum skipum vegna ýmiskonar mála. 

Spænska lögreglan, Guardia Civil, í samvinnu við Landhelgisgæslu Íslands handtók fjóra og gerði 963 kíló af hassi upptæk á dögunum. Áhöfnin á TF-SIF, eftirlitsflugvél Landhelgisgæslunnar, var við landamæraeftirlit á vestanverðu Miðjarðarhafi þegar hún kom auga á hraðbát með torkennilegan varning um borð.

Áhöfnin á TF-GRO, þyrlu Landhelgisgæslunnar, var kölluð út á þriðja tímanum í dag vegna vélarvana strandveiðibáts sem rak að skeri við Ingólfsgrunn á Húnaflóa. Strandveiðibátur í grenndinni kom til aðstoðar.

Varðskipið Týr hefur undanfarna daga verið við eftirlit í Síldarsmugunni en þangað hélt áhöfn Týs á fimmtudaginn. Þegar mest var voru fjórtán íslensk uppsjávarskip á svæðinu í byrjun síðustu viku en í morgun voru þau orðin sjö.