Fréttasafn

Fjórum mönnum var bjargað um borð í TF-EIR, þyrlu Landhelgisgæslunnar, eftir að fiskibátur strandaði í vestanverðum Þistilfirði. Björgunarskipið Gunnbjörg dró fiskibátinn til hafnar á Raufarhöfn. 

Þegar varðskipið Þór var í nágrenni Þorlákshafnar á fimmta tímanum í dag hafði handfærabátur, sem var á leið til Þorlákshafnar, samband varðskipið og óskaði eftir aðstoð vegna vélarbilunar. Varðskipið var þá nýbúið að mæta bátnum sem var á innleið til Þorlákshafnar. Áhöfn varðskipsins brást skjótt við og tók handfærabátinn í tog með léttbát varðskipsins.

Áhöfnin á varðskipinu Tý fékk fræðslu um snjóflóð og snjóflóðaleit hjá Teiti Magnússyni, björgunarsveitarmanni. Þá æfði áhöfnin björgun úr sjó með nýju björgunartæki.

Áhafnir Landhelgisgæslunnar þurfa alltaf að vera til taks. Það er því mikilvægt að huga vel að að andlegri og líkamlegri heilsu. Áhöfnin á Tý er þar engin undantekning og stundar æfingar af miklu kappi á ferð sinni umhverfis landið. Að þessu sinni er áhöfnin svo heppin að með í för er Gígja Vilhjálmsdóttir, þjálfari, sem sér til þess að vel sé tekið á því, kvölds og morgna.

21 tonna fiskibátur strandaði við Gölt á utanverðum Súgandafirði í kvöld. Stjórnstöð Landhelgisgæslunnar barst neyðarkall frá bátnum klukkan 22:00 en fjórir voru um borð. Mönnunum var bjargað um borð í þyrlu landhelgisgæslunnar á miðnætti.

Það var hjartnæm stund í flugskýli Landhelgisgæslunnar í dag þegar fjölskylda Jennýjar Lilju Gunnarsdóttur afhenti þyrlusveit Landhelgisgæslunnar mikilvægar gjafir. Um var að ræða fjórar lyfjadælur auk tveggja blóð og vökvahitara að gjöf úr minningarsjóði Jennýjar Lilju sem lést af slysförum í október 2015, aðeins þriggja ára gömul.

Loftrýmisgæsla Atlantshafsbandalagsins við Ísland hefst að nýju með komu flugsveitar breska flughersins til Íslands í næstu viku.

Línubátur strandaði við Rifstanga á Melrakkasléttu í morgun. Tveir voru um borð. Björgunarskipið Gunnbjörg frá Raufarhöfn tókst að draga línubátinn af strandstað.

Sigurður Steinar Ketilsson, fyrrverandi skipherra hjá Landhelgisgæslunni, var jarðsunginn frá Víðistaðakirkju í gær. Fjölmenni var við útförina. Sr. Einar Eyjólfsson, fríkirkjuprestur í Hafnarfirði, jarðsöng. Starfsfólk Landhelgisgæslunnar vottaði Sigurði Steinari virðingu sína með því að standa heiðursvörð þegar kistan var borin úr kirkju.

Stjórnstöð Landhelgisgæslunnar barst neyðarkall frá togbátbát sem staddur var norður af Stykkishólmi á tólfta tímanum í dag. Þrír voru um borð og var þeim bjargað um borð í fiskiskip sem var í grenndinni.

Gylfi Geirsson, loftskeytamaður og fyrrverandi starfsmaður Landhelgisgæslunnar, heldur fyrirlestur um stofnun Landhelgisgæslunnar og sögu hennar á fræðslufundi Vitafélagsins annað kvöld (6. nóvember) klukkan 20:00. Gylfi gjörþekkir störf Gæslunnar en hann hóf störf hjá Landhelgisgæslunni vorið 1971 og starfaði hjá stofnuninni í 42 ár. Fræðslufundurinn er haldinn í húsnæði Sjóstangafélags Reykjavíkur að Grandagarði 18, 2. hæð og eru áhugasamir hvattir til að mæta.

Sérfræðingar strandgæslustofnana á norðurslóðum hittust á Húsavík fyrir helgi til þess að bera saman bækur sínar og fjalla um brýn mál sem við koma leit- og björgun auk mengunareftirlits á norðurslóðum.