Fréttasafn

Á fyrrihluta ársins 2020 voru nýjar útgáfur af sjö sjókortum gefnar út. Meðal þeirra eru þrjú sjókort sem ná m.a. yfir suðurhluta Breiðafjarðar.

Fyrsta erlenda skútan sem kemur til landsins eftir að landamæraskimun hófst í vikunni lagðist að bryggju í Vestmannaeyjum í dag. Skútan kom upp í kerfum Landhelgisgæslunnar í morgun en þá höfðu skipverjarnir um borð ekki sent upplýsingar um sig til Landhelgisgæslunnar eins og kveðið er á um. Varðstjórar stjórnstöðvar náðu fjarskiptasambandi við skútuna eftir nokkrar tilraunir.

Hitamyndavélin um borð í TF-EIR, þyrlu Landhelgisgæslunnar, skipti sköpum þegar áhöfn þyrlunnar fann göngumann í sjálfheldu í Kroppstaðahorni í Skálavík í morgun. Björgunarsveitir, lögregla, áhöfnin á varðskipinu Þór auk þyrlusveitarinnar höfðu leitað mannsins frá því í gærkvöld þegar hann fannst með myndavélinni. Erfitt reyndist að sjá manninn með berum augum.

Margir vörðu þjóðhátíðardeginum á sjó miðað við tölur úr kerfum stjórnstöðvar Landhelgisgæslunnar. Í hádeginu í gær voru 822 skip og bátar á sjó. Hjá áhöfninni á varðskipinu Þór bar það helst til tíðinda að 15 metra trjádrumbur var hífður um borð í Breiðafirði.

Áhöfnin á TF-SIF, eftirlitsflugvél Landhelgisgæslunnar, fór í eftirlitsflug um Vestfirði fyrr í dag. Flugvélin nýtist einstaklega vel til að hafa eftirlit með lögsögunni enda kemst hún hratt yfir stórt svæði á skömmum tíma.

Óvenju fjölmennt var um borð í varðskipinu Þór við Miðbakka í hádeginu. Ástæðan er sú að þar var haldið sumargrill Landhelgisgæslunnar á bryggjunni. Til að fagna sumrinu og langþráðum sumarfríum komu starfsmenn Gæslunnar saman á höfninni og borðuðu um borð í varðskipinu. 

Áhafnir þyrla Landhelgisgæslunnar og björgunarskipa Slysavarnafélagsins Landsbjargar halda reglulegar sameiginlegar æfingar. Á miðvikudag fór slík æfing fram þegar áhöfnin á Gísla Jóns og áhöfnin á TF-GRO æfðu í einstöku veðri á Vestfjörðum. 

Sjómælingaskipið Baldur hefur að undanförnu verið við mælingar á Breiðafirði. Þessar myndir glæsilegu loftmyndir voru teknar af skipinu í blíðskaparveðri á dögunum. 

Fjögur ný farartæki bættust í flota Landhelgisgæslunnar í dag þegar skrifað var undir leigusamning á fjórum rafhlaupahjólum. 

Hátíðahöld voru með óhefðbundnu sniði á sjómannadaginn en þó var reynt að halda í hefðirnar. Sjómannadagsmessa fór fram í Dómkirkjunni og áhöfnin á Tý fór í útimessu.

Séraðgerða- og sprengjueyðingardeild Landhelgisgæslunnar var kölluð út að beiðni lögreglu að húsi í Hafnarfirði í gærdag vegna torkennilegs hlutar sem fannst við jarðvinnu á lóð húss í miðbænum. Við athugun sprengjusérfræðinga Landhelgisgæslunnar kom í ljós að um var að ræða 20mm sprengikúlu úr seinna stríði sem var virk og nokkuð ryðguð.

Loftrýmisgæsla ítalska flughersins hefst hér á landi um miðjan júní. Liðsmenn flughersins fara í 14 daga sóttkví, læknisskoðun og skimun á herstöð áður en hingað er komið. Þá fara þeir aftur í 14 daga sóttkví á öryggissvæðinu á Keflavíkurflugvelli eftir komuna til landsins.

Áhöfnin á TF-EIR, þyrlu Landhelgisgæslunnar, var kölluð út til leitar í nótt að beiðni lögreglunnar á Norðurlandi eystra vegna manns sem talið var að hefði fallið í Laxá í Aðaldal.