Fréttasafn

Áhöfnin á varðskipinu Þór og starfsmenn Vegagerðarinnar sigla þessa dagana meðfram ströndum landsins vegna eftirlits á ljósvitum, skerjavitum, sjómerkjum og ljósduflum sem ekki er hægt að komast í frá landi. Í vikunni var unnið að viðhaldi á vitanum á Hrólfsskeri og Sævar Már Magnússon, bátsmaður á Þór tók þetta skemmtilega myndband við það tækifæri.

Heilbrigðisstofnun Suðurnesja hefur síðan í janúar bólusett íbúa á Reykjanesi í húsnæði Landhelgisgæslunnar á öryggissvæðinu á Keflavíkurflugvelli. Samstarf HSS og Landhelgisgæslunnar hefur verið afar gott og í vikunni voru fjölmargir bólusettir.

Áhöfnin á TF-EIR æfði um helgina notkun nýrrar slökkviskjólu sem keypt var frá Kanada á dögunum. Æfingin fór fram í Skorradal og fór áhöfn þyrlunnar sex ferðir með skjóluna en vatnið var sótt í Skorradalsvatn.

Sérstakar aðstæður vegna mismundandi verkefna skipanna urðu til þess að varðskipin og sjómælingabáturinn Baldur mættust á Ísafjarðardjúpi og við það tilefni var tekin mynd af öllum flotanum. 

Eftirlits- og sjómælingaskipið Baldur hélt af stað í árlegt sjómælingaúthald mánudaginn 10. maí síðastliðinn. Þó svo að megin verkefni Baldurs séu dýptarmælingar fyrir sjókortagerð þá sinnir hann einnig öðrum verkefnum Landhelgisgæslunnar, þar með talið eftirliti, löggæslu, leit og björgun og aðstoð ýmiskonar

Antony Blinken, utanríkisráðherra Bandaríkjanna, heimsótti Landhelgisgæsluna á öryggissvæðinu á Keflavíkurflugvelli í dag. Georg Kr. Lárusson, forstjóri Landhelgisgæslu Íslands, tók á móti Blinken.

Nýlega efndu Ríkiskaup og Landhelgisgæsla Íslands til útboðs vegna kaupa á varðskipinu Freyju. Fimm tilboð bárust. 

Að undanförnu hefur varðskipið Týr verið við eftirlitsstörf á úthafskarfamiðunum á Reykjaneshrygg, á NEAFC-svæðinu svonefnda.

Þyrlusveit Landhelgisgæslunnar aðstoðaði Brunavarnir Árnessýslu um hádegisbil í dag þegar gróðureldar kviknuðu í Grímsnesi. Þyrlusveitin flutti slökkviliðsmenn frá Selfossi á staðinn en áhöfn þyrlunnar var á æfingu í grenndinni þegar beiðni um aðstoð barst.

Laust eftir hádegi í dag hélt sjómælingabáturinn Baldur úr höfn í Reykjavík áleiðis vestur í Ísafjarðardjúp til mælinga. Á leiðinni var vélarvana bátur tekinn í tog og farið með hann til hafnar á Akranesi. 

Þyrlusveit Landhelgisgæslunnar og áhöfnin á varðskipinu Þór efndu til sameiginlegrar sjóbjörgunaræfingar fyrr í vikunni. Rjómablíða var í Kollafirði meðan á æfingunni stóð. 

Undanfarin þrjú ár hefur Landhelgisgæslan unnið markvisst að bættu líkamlegu atgervi starfsfólks og stuðlað að almennu heilbrigði. Til að byrja með voru haldin þrek- og styrktarnámskeið hjá Mjölni fyrir starfsfólk í Reykjavík og samtímis fóru fram námskeið í Sporthúsinu í Reykjanesbæ fyrir starfsfólk á öryggissvæðinu á Keflavíkurflugvelli.

TF-GNA, nýjasta björgunarþyrla þjóðarinnar, lenti á Reykjavíkurflugvelli á sjöunda tímanum í kvöld. Ferjuflugið frá Noregi hófst í Stafangri í Noregi í gær en millilent var á Hjaltlandseyjum, Færeyjum og Egilsstöðum áður en Gná komst loks í heimahöfn í Reykjavík. 

Áhöfnin á TF-EIR, þyrlu Landhelgisgæslunnar, aðstoðaði Slökkvilið höfuðborgarsvæðisins við slökkvistörf í Heiðmörk í dag.

Í vikunni hélt áhöfnin á varðskipinu Þór árlega æfingu þar sem notkun mengunarvarnabúnaðar varðskipsins var æfð.