Fréttasafn

Áhöfnin á varðskipinu Þór fékk um helgina gefins miða á íslensku tölvuteiknimyndina um þrumuguðinn Þór, frá framleiðanda myndarinnar CAOZ hf. Teiknimyndin Hetjur Valhallar – Þór var heimsfrumsýnd  á Íslandi 14. október síðastliðinn og hefur hún hlotið fádæma lof gagnrýnenda.

Varðskipið Þór hefur laðað að sér fjölda manns dagana frá því að skipið lagði að Miðbakka Reykjavíkurhafnar síðastliðinn fimmtudag. Um 4100 manns komu um borð á sunnudag en samtals hafa nú um 12.000 manns  komið að skoða varðskipið.

Ýmsir erlendir samstarfsaðilar Landhelgisgæslunnar komu til landsins til að verða við komu Þórs til Reykjavíkur.

Mikil aðsókn hefur verið í að skoða varðskipið Þór dagana frá því að varðskipið kom til Íslands og eru nú rúmlega fimm þúsund manns búin að skoða skipið. Í dag, laugardag lögðu um þrjú þúsund og fimmhundruð manns leið sína niður að Miðbakka Reykjavíkurhafnar þar sem varðskipið liggur við bryggju

Varðskipið Þór sigldi í fyrsta skipti inn í Reykjavíkurhöfn  í dag og var eftirvæntingarfullur mannfjöldi samankominn á Miðbakka til að fylgjast með komu hans. Þyrlur Landhelgisgæslunnar Líf og Gná fylgdu Þór inn í höfnina og flugvélin Sif flaug lágflug yfir svæðið.

Þór, nýtt varðskip Íslendinga lagði að bryggju í Vestmannaeyjum kl. 14:00 í dag og var fjöldi fólks samankominn á Friðarbryggju þegar glæsilegt varðskipið sigldi inn höfnina. Þyrlur Landhelgisgæslunnar  TF-LÍF og TF-GNÁ sveimuðu yfir meðan varðskipið sigldi inn.

Þór, nýtt varðskip Íslendinga kemur til Reykjavíkur á morgun, fimmtudag og verður tekið á móti varðskipinu á Miðbakka Reykjavíkurhafnar kl. 14:00 á morgun fimmtudag. Verður varðskipið opið til sýnis til klukkan kl. 17:00 og eru allir velkomnir um borð.

Landhelgisgæslan nýtur traust 78,3% landsmanna samkvæmt könnun Markaðs og miðlarannsókna (MMR) á trausti til helstu stofnana á sviði réttarfars og dómstóla. Eru niðurstöðurnar nær óbreyttar frá fyrri mælingum.

Varðskipið Þór er nú komið inn í íslenska leitar- og björgunarsvæðið og verða Vestmannaeyjar fyrsti viðkomustaður þegar komið er til Íslands. Leggst varðskipið að bryggju í Friðarhöfn á morgun, miðvikudag kl. 14:00 og verður skipið opið til sýnis milli kl. 14:00-20:00.

Þyrla Landhelgisgæslunnar stóð kl. 22:35 í gærkvöldi línubát að meintum ólöglegum veiðum á Fljótagrunni,  inni í hólfi þar sem veiðar eru bannaðar skv. reglugerð nr. 742/2009 um bann við línu- og handfæraveiðum á Fljótagrunni..

Varðskipið Þór, nýtt eftirlits- og björgunarskip Íslendinga er nú á siglingu frá Halifax til Íslands. Vestmannaeyjar er fyrsti viðkomustaður varðskipsins en það leggur að bryggju í Vestmannaeyjum miðvikudaginn 26. október nk.  Verður varðskipið opið til sýnis milli kl. 14:00 og 20:00 og eru allir boðnir hjartanlega velkomnir um borð.

Framkvæmdir við endurbætur raflagna í byggingum sem Landhelgisgæslan hefur umsjón með innan öryggissvæðis á Keflavíkurflugvelli hafa verið í undirbúningi og eru útboð hafin á fyrstu áföngum.

Í vikunni hittust stjórnendur allra deilda Landhelgisgæslunnar á fundi í Keflavík þar sem farið var yfir verkefna- og rekstrarlega stöðu deilda og horfur fyrir árið 2012.  Um er að ræða reglubundna fundi sem eru hluti af innra starfi Landhelgisgæslunnar.

Líf, þyrla Landhelgisgæslunnar tók um helgina þátt í landsæfingu Slysavarnarfélagsins Landsbjargar á Ísafirði. Í æfingunni var björgunarsveitum skipt í hópa sem tókust á við verkefni af ýmsum toga, þ.a.m. verkefni þar sem þyrlan var fengin til aðstoðar. Tók þyrlan þátt í verkefnum sem m.a. fólust í rústabjörgun og flutningi slasaðra eftir hópslys.

Hér má sjá myndir sem voru teknar af varðskipinu Þór við Panamaskurð.