Fréttasafn

Varðskipið Freyja er nú komið á flot í litum Landhelgisgæslunnar í Rotterdam. Varðskipið var tekið upp í slipp fyrr í mánuðinum þar sem það var málað og unnið að minniháttar lagfæringum. Áhöfn Freyju er komin til Hollands og undirbýr heimsiglinguna. Gert er ráð fyrir að skipið komi til Siglufjarðar þann 6. nóvember.

Í dag eru tíu ár frá komu varðskipsins Þórs til landsins. Skipið hafði fyrst viðkomu í Vestmannaeyjum þann 26. október árið 2011 að viðstöddu fjölmenni. Það þótti vel við hæfi þar sem fyrsta varðskipið Þór, sem upphaflega var keypt til björgunarstarfa við Vestmannaeyjar, varð upphafið að stofnun Landhelgisgæslunnar árið 1926.

Varðskipið Freyja er nú komið í slipp í Rotterdam þar sem það er málað í litum Landhelgisgæslunnar. Prófanir fóru fram á skipinu og búnaði þess í síðustu viku og gengu vel.

Northern Challenge, árleg æfing sprengjusérfræðinga, hófst formlega á öryggissvæðinu á Keflavíkurflugvelli í dag og stendur fram í næstu viku. Um er að ræða alþjóðlega æfingu Atlantshafsbandalagsins sem Landhelgisgæslan hefur veg og vanda af. Hún fer að stærstum hluta fram á starfssvæði Landhelgisgæslunnar á Keflavíkurflugvelli. Þetta er í tuttugasta sinn sem æfingin er haldin.

Áhöfnin á varðskipinu Þór dró um fimmtíu grindhvalshræ úr fjörunni í Melavík á Ströndum um borð í varðskipið Þór í dag. Grindhvalina rak á land í Árneshreppi á Ströndum fyrr í mánuðinum. Hræin voru dregin með léttbátum varðskipsins og hífð með krana um borð í Þór.

Tólf starfsmenn Landhelgisgæslunnar, Slökkviliðs höfuðborgarsvæðisins og Ríkislögreglustjóra voru í dag útskrifaðir sem björgunarkafarar við hátíðlega athöfn í Skógarhlíð. 

Fjórir skipverjar á skútu sem strandaði við Æðey í Ísafjarðardjúpi voru hífðir um borð í þyrlu Landhelgisgæslunnar.

Þyrlusveit Landhelgisgæslunnar var kölluð út að beiðni almannavarna til að aðstoða við rýmingu í Útkinn vegna aurskriða sem þar féllu. Fjórir voru fluttir til Húsavíkur. Þyrlusveitin flaug um svæðið í gær ásamt lögreglu til að meta aðstæður.

Um þessar mundir stendur yfir sameiginlegt köfunarnámskeið Landhelgisgæslunnar, Slökkviliðs höfuðborgarsvæðis og Ríkislögreglustjóra um borð í varðskipinu Þór.